Madinaeag on nga nakapagtapos sa PNP Special Weapon and Tactics (SWAT) Course, ro 4 nga outstanding personnel halin sa 2nd Aklan Provincial Mobile Force Company.
Ginkilaea ro mga raya nga sanday Pat Edeniel Villariez, Pat Alvin Lachica, Pat Niel Patrick Reano, ag Pat Alex Yecla Jr., nga nagpakita it pinasahe nga dedikasyon ag determinasyon sa tiempo it andang training.
Ginpatigayun ro graduation ceremony sa 2nd Iloilo PMFC Headquarters, sa Camp Jalandoni sa Barangay Zerrudo, Sara, Iloilo.
Ro nasambit nga training course, hay tinawag nga Class 03-16-R6-2023-008 “INTREPIDUS” RTAP, hay nag testing sa andang pisikal ag mental nga abilidad sa nagkasari sari nga SWAT techniques ag combat strategies.
Ginapabugae man it 2nd Aklan PMFC nga naangkon ni Pat Niel Patrick S Reano ro respetadong titulo nga “Top Gun of the Class” ag ro titulo bilang “Tarzan of the Class (Strongman).”
Nakabuoe man it posisyon si Pat Alex R Yecla Jr sa “Top 3 of the Class.”
Ro mga deserving personnel halin sa 2nd Aklan PMFC hay owa eamang nagtao it kadungganan sa andang unit kundi pati man sa bilog nga probinsya it Aklan. // ANN DESLENE SALAZAR
