NAGTUO si Kath Cortez, vice chairperson sa National Union Journalist of the Philippines kun NUJP nga taas pa ang tungason aron hingpit maangkon ang tinud-anay nga hustisya alang sa 58 nga namatay sa Maguindanao massacre lakip dinhi ang 32 ka mga media practitioner.
Segun ni Cortez nga sa milungtad sa 10 ka tuig bag-o nakapagawas og desisyon ang korte ug karon may apela ang mga akusado ngadto sa Korte Suprema ingon man ang sa bahin sa mga pamilya sa mga biktima nga pahamtangan usab og guilty verdict ang mga wala pa nadakpan.
Dugang niini nga wala pa nahuman ang pagpaningkamot sa bahin sa mga pamilya sa mga biktima sa mangilngig nga krimen luyo nga gihinumdom ang 12 ka tuig sukad sa insidente niadtong Nobyembre 23,2009 sa Sityo Masalay, Brgy.Salman, Ampatuan, Maguindanao.
Sa bahin usab sa NUJP gibutyag ni Cortez nga naka-facilitate kini og tabang sa pipila ka mga anak sa mga biktima aron makakuha og scholarship asa ang uban matud pa kanila nahimo nang pulis ug accountant. Kagahapon segun ni Cortez, nagpahigayon sila og candle lighting sa Bantayog ng mga Bayani ingon man noise barrage nga nagasimbolo nga kinahanglan ang padayung pagsaba saba alang sa maong kaso hangtud maangkon ang tinud-anay nga hustisya alang sa 58 ka mga biktima.
