Ginklaro makarun it LGU-Malay kaangot sa nagakalat nga video halin sa Tiktok sa username nga @adycots nga nagahambae nga may “mini outbreak” it kaso it COVID-19 sa Boracay Island.
Base sa LGU Malay nga may daywa ka (2) aktibong kaso it COVID-19 sa bilog nga banwa it Malay (Boracay Island ag Mainland Malay).
Ro record ngara hay halin sa Municipal Health Office it LGU Malay nga nag-report kara ku June 12, 2022.
Sa presente, ro banwa it Malay kaeakip ro isla it Boracay hay nakalista it vaccination status para sa first dose nga 100%, samtang 101% man para sa second dose.
Ginpasiguro man it LGU Malay nga padayun raya nga naga monitor sa mga kaso ag padayun nga magapatuman it Minimum Public Health Standards base sa mga protocols it gobyerno.
Ginpasiguro man it LGU Malay sa publiko nga ro isla it Boracay hay nagapabilin nga salbar nga agtunan sa idaeum it New Normal bangud ro Boracay hay Better Than Ever. / ANN DESLENE SALAZAR
