Ginbawian gid sang kabuhi ang tigulang nga na-hit and run sang isa ka pick-up nga salakyan sa Brgy. Tugas, Mambusao, Capiz pasado alas 6:00 kagab-i sang Sabado, Enero 27.
Ginkilala ang biktima kay Francisco Villareal, 61-anyos kag residente sang nasambit nga barangay.
Samtang ang driver sang salakyan amo si Allen Velado, 43-anyos, residente sang Brgy. Jaena Norte, Jamindan.
Sa interview sang Brigada News FM Roxas kay Police Lieutenant Shaney Allanic, hepe sang Mambusao Municipal Police Station, iya ginpahayag nga nagikan sa banwa sang Jamindan ang salakyan nga ginamaneho ni Velado kag magapadulong kuntani sa banwa sang Dumalag.
Apang pag-abot sa Brgy. Tugas, nagalakat sa higad sang karsada ang biktima kag hinali nalang nga nagtabok rason nga aksidente ini nga nabungguan sang salakyan.
Suno kay Allanic, nag-igo gid ang lawas sang biktima sa bumper sang salakyan.
Bangud sa kahadlok sang driver, nagdaretso ini sa pagmaneho kag didto nagsungka sa Sigma Municipal Police Station.
Ginpadangat pa sa Mambusao District Hospital ang biktima apang ini ang gindeklarar sang doktor nga dead on arrival matapos nag-angkon sang patal nga pilas sa lawas.
Sa karon, yara na sa kustodiya sang Mambusao PNP ang driver kag salakyan para sa nagakaigo nga disposisyon.
Desidido naman nga magpasaka sang kaso ang pamilya sang biktima batok sa suspek. | Judy Ann Juare
