MITAAS ang tax collection sa BIR-GenSan ning tuiga ug misobra sila sa ilang target collection.
Matud ni Revenue officer, Samir Muti sa BIR-GenSan nga subay sa ilang official record sukad Enero hangtud Nobyembre 2021, mokabat sa 4 percent ang usbaw sa ilang tax collection o mokabat sa P123 million.
Matud ni Muti nga ang mga factor nga naka-contribute nganong nalampasan ang ilang target collection mao ang agresibong tax information drive, gipakusog pa nga tax enforcement activity sama sa tax compliance verification drive asa gina-monitor ang dagkong taxpayers.
Gidugang pa niini nga bisan may pandemya, apan kinahanglan sa gobyerno nga mangita og buhis mao nga ginahimo usab nila ang tanan aron nga adunay magamit nga pondo sa mga programa sa gobyerno.
Sa karon wala pay quota ang BIR GenSan alang sa sunod tuig apan gilauman nga sobra kini sa ilang kasamtang target tax collection nga anaa sa hangtud P3 billion.
Ning tuiga nalampasan nila ang ilang target collection tungod miarang arang na ang ekonomiya tungod sa gipaluagan nga restrictions ug nangabli na usab ang mga negosyo.
