Himas rehas ang tatlo ka mga durugista matapos nadakpan sang mga kapulisan sa ginkasa nga drug buy bust operation sa Sitio Hermano, Brgy. Punta Tabuc, Roxas City takna alas 7:52 kagab-i sang Huwebes, Hulyo 25.
Ginkilala ang mga nagkaladakpan nga sanday Mark Flaga, 36-anyos, tricycle driver, priority target sang operasyon kag residente sang Brgy. Sibaguan, Roxas City; Bonnie Decendario, 38-anyos, construction worker, residente sang Mambiranan, Calinog, Iloilo kag Rene Pinaso, 66-anyos, wala sang trabaho kag residente naman sang Sitio Hermano, Brgy. Punta Tabuc, Roxas City lunsay mga High Value Individual (HVI).
Nahibaluan, nabaklan sang police poseur buyer sanday Mark kag Rene sang isa ka sachet sang ginasuspetsahan shabu sa balor nga P21,000.
Narekober pa gid sa paghinakop kag posisyon ni Mark ang dugang nga 24 tanan ka sachets sang shabu kag pila ka mga non drug items. Ginabanta nagabug-at sa 125 gramos ang nakumpiskar nga iligal nga droga kag may Standard Drugs Price nga P850,000.
Sa karon, nagapabilin ang mga ini sa kustodiya sang Roxas City Police Station kag natalana nga pasakaan sang nagakaigo nga panumbungon. | Judy Ann Juare
