Mabudlay pa para kay Mr. Bonifacio Ambay, tatay it ginpatay nga pawnshop manager nga patawaron ro suspek nga si Mark Archie Torrefiel sangka security guard.
Sa interview kay Mr. Bonifacio, tawo malang imaw ag sangka ama, ngani indi pa nana kayang magpatawad eabi pa ag brutal ro inagom it anang unga nga si Bonna Hercia Ambay, sangka pawnshop manager.
Suno kay Mr. Bonifacio, mabuot ag matinumanon nga klase it unga si Bonna ag pirme rayang naga eaong kanda kung may ginaagtunan.
Mensahe man kara sa suspek nga dapat kara nga sabton sa laye ro ginhimo sa anang unga nga owa it kalaban-laban.
Maabu segun imaw nga ginsakripisyo bilang sangka ama, mapa-eskwela eamang ro anang unga.
Nasayuran nga si Mr. Bonifacio hay sangka OFW sa Middle East sa sueod it 15 anyos ngani mabuhay nana nga owa nakaibahan ro anang pamilya.
Sa makarun hay prayoridad it pamilya Ambay nga mataw-an it hustisya ro andang unga nga si Bonna Hercia.
Matandaan nga nasapwan nga patay ag maabung pagbuno sa eawas ku Lunes, Hunyo 6, 2022 it agahun ro biktima nga si Bonna sa sueod it anang ginatrabahuhan nga pawnshop iya sa Kalibo kung siin nag-reliever eamang imaw. / ANN DESLENE SALAZAR
