-DAINA GERONA
KABANKALAN CITY, Negros Occidental — Nagapabilin nga wala pa madakpan ang suspetsado sa pagpanglabo-patay sa caretaker sa isa ka punong sa So. Calumpang, Brgy. Bucana, banwa sang Ilog, tinalikdan nga Sabado, Mayo 11, ginabulubanta las-3 sang kaagahon.
Ginkilala ang biktima sa Kay Dennis Ambong alyas “Butchok, 54 anyos, caretaker sang punong sang alimango kag residente sang Brgy. Tabu sa amo man nga banwa.
Base sa panalaysayon sang isa ka concerned citizen nga nasapwan na lamang ang bangkay ni Butchok mga las-6 na sang aga sa kilid sang suba nga may agi sang labo sa iya nga guya, li-og kag tiyan nga amo nga gintuna-an sang iya sini nga kamatayon.
Gintingwa-an naman nga gindala sa Kabankalan District Hospital ang biktima, apang ini na ang gin-pagadeklara nga dead-on-arrival.
Sa imbestigasyon sang Ilog police investigator, nakit-an nga may yara pa sang tinulo sang dugo sa iban nga bahin sang punong, nga nagapatima-an nga nagtingwa pa kun tani si Butchok nga magpalagyo.
Nahibaluan nga sang gab-e bag-o magluntad ang insidente, nakig-inom pa si Butchok sa proper Calumpang, kaupod ang iya nga mga barkada, kag hubog ini sang siya ang ginlabo. Sa karun, may yara na sang person of interest ang mga katapo sang kapulisan kag ang isa sa mga motibo nga ginapanglantaw amo ang pagdumot ukon aligotgot.*