LEGAZPI CITY – Supisyente pa man su boot an supply nin dugo sa Albay ngunyan na bulan nin Setymebre segun sa Philippine Red Cross Albay.
Sa intrevista kan Brigada News FM Legazpi kay Nicole Malagueño, Medtech gikan sa Red Cross Albay, sinabi kaini na dae nagkukulang an supply nin dugo sa probinsya huli sa sunod-sunod na bloodletting activity kan mga pribadong sektor, barangay, local government units, asin iba pang stakeholders.
Segun kay Malagueño, an saindang nehihiling na rason kun nata bastante an supply nin dugo iyo an dai pagkakaigwa nin shortage sa saindang opisina siring man sa mga city asin municipal health office magin man sa Department of Health (DOH).
Dugang pa kaini, nakakapagtao pa sinda sa ibang mga chapter siring man sa mga probinsya kan Catanduanes magin sa Sorsogon asin mga ospital na nangangaipuhanan kaini.
Dakol man su boot an nagpapasiring sa Philippine Red Cross na naghahagad nin dugo kun saen tulos man naitatao sa pamilya.