NAGPABILIN nga nagahulat ang mga residente sa Purok San Lorenzo Ruiz sa Barangay Apopong sa tubag gikan sa City Veterinary Office sa LGU Gensan sa ilang pangutana kung makabalik na ba sila sa pagpamuhi og baboy human nga sila ang naigo sa African Swine Fever kun ASF kaniadtong nanghinapos sa bulan sa Enero sa kasamtangan nga tuig.
Kalabot niini, personal nga gipadulongan sa Brigada News team ang buhatan sa City Vet aron nga makuha ang pamahayag kalabot sa maong hisgotanan.
Apan gikanayon sa ilang labaw nga si Dr. Antonio Ephrem Marin nga pa-retiro na kini ug si Dr. Rex Calub nalang ang kuhaan og pamahayag ug nagdumili usab kini sa pagluwat og pamahayag tungod kay wala pa kini ginagunitan nga papel isip OIC sa maong buhatan.
Nasayran nga nagahangyo na ang mga residente nga tugotan na unta sila nga subling makapamuhi og baboy tungod kay dako kaayo ang nawala kanila sukad nga naigo sa ASF ang usa sa nagbuhi og baboy sa ilang lugar.
Sa impormasyon moretiro na si Dr. Marin sa Hunyo 18 ug nakabakasyon na kini maong dili na moluwat og pamahayag sa iyang opisyal nga kapasidad isip labaw sa maong buhatan. I Danny Casi
