Arestado ang isa ka soltero matapos nakuhaan sang ginapatihan marijuana sa ginapatigayon nga police checkpoint sa Barangay Tanza, Roxas City.
Ginkilala ang naaresto kay French John Vito, residente sang Barangay Poblacion Ilaya, Panay Capiz.
Sandig sa impormasyon nagikan sa Roxas City PNP, nagapatigayon sang checkpoint sa nasambit nga barangay ang mga kapulisan sang ginparahan nila ang Suzuki Smash nga motorsiklo nagaduag blue nga ginamaneho sang suspetsado apang sa baylo nga magpundo nagdaretso ini kag ginpadasig ang pagpadalagan.
Nakuha sa posesyon ni Vito ang 1 ka plastic ziplock bag nagaunod sang ginaalegar marijuana, lighter, papel, 2 ka sunglass case, 1 ka rocket pipe glass, kilohan, cellphone, P766 nga kuwarta, ballpen kag motorsiklo.
Ginabanta nga nagabug-at sang masobra 9 ka gramos ang ginaalegar marijuana nga nagabalor naman sang P1,120.
Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 si Vito.
Sa karon, nakahunong ini sa karsel sang Roxas City PNP para sa nagakaigo nga disposisyon. | Judy Ann Juare
