Subling gipahimangnuan ni Davao City Mayor Sebastian ‘Baste’ Duterte ang mga Dabawenyo sa mga angay ug dili angay nga dalaon atol sa 38th Kadayawan Festival.
Gipamugos sab sa alkalde nga kinahanglang mag-igmat ang matag usa ug magbinantayon sa palibot aron nga malinawon nga saulogon ang Kadayawan.
Ang mensahe sa mayor atol sa iyang pagtambong sa send-off ceremony sa 38th Kadayawan Festival nga gipahigayon sa DCPO Parade Ground, Camp Captain Dominggo E Leonor San Pedro Street, alas-3:00 kagahapon sa hapon, Agosto 8, 2023.
Samtang, gitapos sab ang maong aktibidad sa usa ka presentasyon nga nagpakita sa mga nakumpiska nga Bora-bora o Modified Mufflers.
Sa datos sa Davao City Police Office anaa na sa 254 modified mufflers ang nakumpiska gikan Hulyo 2 hangtod sa kasamtangan.
Nagpasabot na lamang kini nga determinado ang kapulisan sa pagpatuman sa mga ordinansa sa syudad alang sa kaayohan sa tibuok komunidad.
