Naging madinaeag-on ro selebrasyon sa kaadlawan ni Kalibo Mayor Juris Bautista Sucro, kabii base sa pahayag ni Police Major Willian Aguirre Deputy Chief of Police it Kalibo MPS.
Raya hay sa pihak it pagdagsa it maabung tawo sa Pook Jetty Port bangud sa free concert ag papremyo nga gintao it alkalde.
Suno kay Major Aguirre ro estimated crowd nanda sa nasambit nga okasyon hay 40,000 pero ala una paeang segun it hapon hay somobra eon sa 40k ro tawo nga nag aeabutan.
Maliban sa Kalibo PNP personnel hay nagbulig man ro personnel halin sa Aklan PPO para sa pagtao it seguridad sa nasambit nga event kung siin, umabot sa 156 ro augmentation forces.
Owa segun it natabo nga komosyon ag maayos man ro parking sa mga saeakyan, pero may nailista sanda nga 7 indibidwal nga nalipong ag may naduea nga unga pero nakita man ag pilang gamit nga na-missing.
Ginhayag man ni Major Aguirre nga sa mismong event area hay hugot nanda nga ginpatuman ro no drinking ag vaping.
Samtang, ginpasaeamatan man it Deputy Chief of Police ro tanan nanda nga naging kapartner nga ahensya ag komunidad para masiguro ro safety it mga tawo sa nasambit nga event. // ANN DESLENE SALAZAR