GIHANGYO sa otoridad sa mga security managers sa mall, terminal, pantalan ug ubang establisimento nga gihugtan ang ilang siguridad human ang Marawi blast.
Nagpahigayon og security managers forum ang kasundalohan ug kapulisan nga gitambongan sa mga security managers gikan sa mga vital installation ug places of convergence.
Butyag ni Amon Ledesma, tigdumala sa GenSan Bulaong terminal miapela kanila ang otoridad nga hugtan ang ilang seguridad, sama sa terminal nga getaway sa rehiyon-12.
Nahisgotan usab sa pulong, butyag ni Col. Ruben Aquino, commander sa Joint Task Force GenSan (JTF) ang mga mikatag nga bomb threat messages. Sa bahin ni Police Col. Nicomedes Olaivar Jr., director sa GenSan City Police Office (GSCPO) padayon silang nakaalerto bisan paman walay nadawat nga bahad sa seguridad.
