SORSOGON CITY—Umarangkada na ang satellite registration ng Commission on Election (Comelec) sa ilang barangay sa lungsod ng Sorsogon.
Ayon kay City Election Officer Atty. Karla Sincua Jerrera, layon ng nasabing hakbang na makahikayat ng mas maraming mga magpaparehistro gayundin maiwasan ang pagsisiksikan sa kanilang opisina.
Sa pamamagitan din umano nito ay mas mapapabilis ang pagpaparehistro at iwas abala rin sa oras at pamasahe dahil hindi na kailangang magtungo pa sa kanilang opisina na nasa City hall Compound sa Brgy Cabid-an na medyo may kalayuan din.
Kaugnay nito ay naka schedule ang satellite registration sa covered court ng Barangay Pangpang sa Hulyo 13, Hulyo 16 naman sa Bacia auditorium sa Poblacion Bacon at sa Bato covered court sa Barangay Bato, Bacon sa Hulyo 19.
Noong Sabado, Hulyo 9 ay nagsimula ang kanilang satellite registration sa covered court ng Brgy Talisay.
Sa mga nais namang magsadya sa tanggapan Comelec ay bukas ito Lunes hanggang Sabado at kahit tuwing holidays mula alas 8:00 ng umaga hanggang alas 5:00 ng hapon.
Hulyo 4 nang simulan ang voter registration at magtatagal ito hanggang sa Hulyo 23 ngayong taon.###
