GIDUSO sa Sarangani Province nga madeklara nang drug cleared ang 141 ka barangay sa probinsiya sunod tuig. Matud ni Governor Steve Chiongbian Solon, nakig-alayon sila sa otoridad aron madeklara na nga limpyo sa epekto sa iligal nga droga ang nabiling lima ka apektadong barangay.
Sa taho Philippine Drug Enforcement Agency (PDEA) 12 ang probinsiya ang dunay labing ubos nga affection rate nga naa sa 3.55%. Tandi sa ubang probinsiya sa rehiyon sama sa Sultan Kudarat nga dunay 4.82% nga affection rate; South Cotabato naay 16.08%; North Cotabato 18.60% samtang naa sa 65.38% ang GenSan.
Sa rekord sa ahensiya, naa nalang 11 nabiling pushers samtang 303 users sa pito ka munisipalidad sa probinsiya. Ang probinsiya ang dunay Balay Silangan o temporaryong puy-anan ug nag-offer og tulo ka bulan nga rehabilitation program sa mga drug offenders. (Richel Gubalani)
