KABANKALAN CITY, Negros Occidental — Naga lumaw-lumaw ang mata samtang gina-pakigbahin sang bata nga babayi sang mangunguma nga napatay sa engkwentro sa syudad sang Escalante, ang iya kasubo nga maga-gradwar ini sa kolehiyo nga wala na sa iya luyo ang iya pinalangga nga amay.
Sa eklusibo nga interview sang Brigada News FM-Kabankalan kay Charlene Caramihan, maga-gradwar na ini sa maabot nga Hunyo, halos apat ka bulan matapos napatay ang iya amay sa isa ka engkwentro sa Sitio Mansulao, Barangay Pinapug-asan, syudad sang Escalante, sang Pebrero 21, 2024.
Iya gin-pakigbahin ang mensahi, kuntani para sa iya ginikanan nga iya gin-balhag 40-diyas antis napatay ang iya amay nga si Jose Caramihan sang mga militar, matapos gina-alegar isa ini ka miyembro sang New People’s Army (NPA).
“Ma, Pa, mahal na mahal ko po kayo. Kayo ang dahilan kung bakit ako nagpapatuloy sa aking mga pangarap. Hinihiling ko sa kanya [God] na bigyan pa kayo ng mahabang panahon o buhay dito sa mundo para ipakita sa inyo ang buhay na aking ninanais na maranasan ninyo,” kabahin sang mensahi ni Charlene.
Plano ni Charlene nga pagka-tapos ang iya graduation, mangita ini sang trabaho para mabuligan ang iya ginikanan, ilabi na ang iya iloy nga may masakit, apang nagasulay sa kainitan para mag-ubra sa kampo, agud may ipa-eskwela sa iya, sa isa ka pribado nga eskwelahan sa nasambit nga syudad.
Maga-gradwar si Charlene sa kurso nga Bachelor in Secondary Education major in Filipino.*