Nakilala na ang identity sang rebelde nga napatay sa engkwentro batok sa 82nd Infantry Batallion sang Philippine Army sa Lambunao, Iloilo sang tinalikdan nga Setyembre 19.
Ang napatay amo si Jemar Diaz, 20-anyos, residente sang Barangay Tacayan, Tapaz, Capiz miyembro sang Communist Terrorist Group (CTG) nga naga-operate sa idalom sang Baloy Platoon, Central Front, Komiteng Rehiyon-Panay.
Ini ang ginkumpirma ni Lt. Col. J-Jay Javines, tagpamaba sang 3rd Infantry Division Philippine Army sang ma-interview sang Brigada News FM Roxas City.
Suno kay Javines antes natabo ang engkwentro, may yara sang operasyon ang 82nd Infantry Batallion sa Brgy. Cabatangan, Lambunao kun sa diin Setyembre 18 sang gab-i nakabaton ang mga ini sang report nga may yara sang presensya sang rebelde nga grupo sa Sitio Agdalusan, Brgy. Jayobo sang nasambit nga banwa.
Dugang pa sini, aga sang Setyembre 19, ginpadulungan sang mga katapo sang militar ang lugar kag didto na natabo ang engkwentro nga nagdugay sang 20 minutos.
Ginpahayag ni Javines nga yara sa kapin 10 ka mga rebelde ang na-engkwentro sang mga militar.
Ang nasambit nga engkwentro ang nagresulta sang kamatayon Private First Class Mars Echevarria, residente sang Kabankalan, Negros Occidental nga nag-angkon sang patal nga pilas sa ulo kag pagkapilas naman ni Private First Class Joemarie Llesis.
Nahibaluan nga nag-angkon man sang patal nga pilas sa dughan ang napatay nga rebelde kun sa diin ginbilin lamang ini sang iya mga kaupdanan sa duyan antes nagpalagyo.
Nagapanawagan naman si Javines sa mga pumuluyo sang nasambit nga barangay nga kun may makita nga pilason kag armado nga persona magpakig-angot gilayon sa ila nga Barangay Kapitan ukon mga kapulisan agud madala sa ospital kag mahatagan sang nagakaigo nga pagbulong.
Sa karon, yara na sa estable nga kondisyon si Llesis matapos na-operahan samtang ang bangkay sang rebelde ang yara sa isa ka punerarya sa Lambunao, Iloilo. | Judy Ann Juare
