Gikostudiya sa San Isidro police station ang usa ka pulis human nanghanting og kwaknit atong Domingo, Hulyo 18, alas-2 sa hapon sa Purok Guadalupe, Barangay Conel, Gensan.
Ang nasikop mao si PSSg. Ibañez Faldas, 33-anyos, nadistino sa Polomolok Municipal Police Station, nagpuyo sa Barangay Silway 8, Polomolok, South Cotabato apil ang duha ka menor de edad nga silang alyas Kyle, 17 anyos ug Carlo, 15 anyos tungod sa kalapasan sa An Act Providing for the Conservation and Protection of Wildlife Resources and their Habitat.
Sa report sa kapulisan, nagpahigayon og operasyon ang mga personahe sa Department of Environment and Natural Resources (DENR) sa pagpanguna ni Maria Elvira Lumayag, CENR officer kauban ang kapulisan sa San Isidro.
Nakuha gikan sa mga dinakpan ang 59 ka kwaknit, unom ka motorsiklo, usa ka unit sa 12 gauge shotgun nga walay serial number.
Giandam na ang kasong may kalabotan sa RA 9147 kon An Act Providing for the Conservation and Protection of Wildlife Resources and their Habitat.
Gidala usab sa Dr. Jorge P Royeca Hospital ang tulo aron masusi ang panglawas unya gipahibalo sa ilang mga katungod subay sa batakang balaud.
