Nagpaandam sa publiko ang Philippine Statistics Authority (PSA) Capiz nga likawan ang online transaction para sa pag-proseso sang anuman nga civil registry documents.
Sa interview sang Brigada News FM Roxas City kay Ms. Anna Bolante, Information Officer I sang PSA- Capiz, iya ginpahayag nga wala nagabaton sang online transaction ang Civil Registration System (CRS) outlet sa may bahin sang Sitio Uno, Pueblo de Panay, Lawaan, Roxas City.
Suno kay Bolante, may nakalab-ot sa ila talapatan nga may yara sang nabiktima sang pagpanunto bangud sa online transaction kun sa diin nagpa-process sang authenticated live birth ang biktima kag nagbayad sang P350 apang kun walk-in P155 lamang ang ginabayaran.
Dugang pa ni Bolante nga wala nila gina-allow ang mga fixers sa ila talatapan bangud maidid ang proseso sa pag-request sang documents kag kinahanglan sang valid ID ukon authorization letter antes mag-release.
Ginklaro man sini nga wala pa sang online appointment ang PSA- Capiz.
Nagpanugyan man ini sa publiko ukon sa mga indibidwal nga luyag mag-process sang civil registry documents nga indi na mag-agi sa online transaction para sa madasig nga proseso kag kun mahimo magdirekta nalang CRS outlets agud indi matuntuhan. | Judy Ann Juare
