Hugot nga gikondena sa Integrated Bar of the Philippines Davao Chapter ang gihimong pagpamusil patay ngadto kang Atty. Sitti Gilda Mahinay-Sapie ug sa iyang bana nga kanhi Mayor sa Panamao Sulu nga si Muhaimin Sapie niadtong Miyerkules sa hapon.
Nanawagan ang maong kahugpungan sa Davao City Police Office nga palawman og maayo ang ginahimong imbistigasyon sa kaso aron mailhan ug madakpan ang responsable sa brutal nga pagpatay sa magtiayon.
Giawhag usab sa IBP Davao Chapter ang gobyerno nga lantawon ang maong hitabo aron hatagan og proteksyon ug siguruhon nga dunay saktong proteksyon ang mga abogado aron dili mabutang sa peligro ang kinabuhi samtang nagabuhat sa ilang trabaho.
Sa karon padayon ang ginahimong imbistigasyon ug pagpangaylap og ebidensya ang Talomo Police Station alang sa posibleng pag-ila sa nagpaluyo sa krimen.
Nasayrang kagahapon, subay sa interview sa Tira Brigada Program sa usa sa mga naka-witness sa panghitabo, gisaysay niini nga planado na ang maong krimen sanglit ang magtiayong Sapie lamang ang puntirya sa pagpamusil ug wala gidamay ang ubang tawo nga anaa sa crime scene subay usab sa actual video footage atol sa krimen.
Nagtoo ang wala gipanganlang saksi, nga dunay kapasidad ug dakong rason ang nagbuhat sa krimen nga gitoohang resulta sa dagko ug bug-at nga isyu nga gihuptan sa magtiayon. BNFM-DAVAO
