Nakaaresto ro Police Regional Office (PRO-6) it 235 nga mga wanted person ag 77 nga mga drug suspect sa sueod it sang dominggo halin ku Hulyo 5 hasta 11, sa bilog nga Western Visayas.
Sa 230 nga operasyon kontra sa mga pugante, ginpakita sa record it PRO-6 nga 41 kara hay napabahin sa Top 10 wanted men sa municipal ag provincial level.
Sa 57 nga operasyon kontra droga, P1.3-million pesos nga balor it ginadudahan nga shabu ro nakumpiska it mga operatiba.
Sa kampanya kontra sa mga loose firearms, an-um katawo ro naaresto sa an-um nga operasyon ag 99 nga mga baril ag 24 nga explosives ro gin-surrender.
Base sa tagapaghambae it PRO-6 nga si Police Lieutenant Colonel Joem Malong, ro mga achievements ngara hay bangud sa sang dominggo nga pagkasa it PRO-6 it “Birada Semana” kontra sa mga loose firearms pati eonman sa mga wanted persons and drug personalities. / ANN DESLENE SALAZAR
