GIKALIPAY ni Dr. Fidel Peñamante Presidente sa Philippine Medical Association Gensan- chapter ang dako nga vaccination rate nga nakuha sa syudad atol sa gimuntar nga 3day national vaccination drive nga mikabat sa 90, 018 ka tawo ang dugang nabakunahan.
Ang maong ihap ang naka-aghat kaniya nga padayong mosuporta sa vaccination. Tungod dako kini nga tabang alang sa tanang lumulopyo sa dakbayan labaw na sa ekonomiya sa syudad nga hinay-hinay nang mibangon. Gibutyag sa opisyal, ang pagbakuna mao ang dakong rason sa pagkanaog sa kaso sa Covid-19, dili lang sa Gensan kundili lakip sa tibook nasod Pilipinas. Ug kini usab ang naga-protekta sa lawas sa tawo aron dili matam-an sa virus.
Miubos matud pa ang na- admit sa mga ospital nga may kasong Covid, ug paigo na ang mga oxygen tank alang sa tanang pasyente. Tungod niini magmugna pag-usab ang gobyerno og tulo kaadlaw nga ‘Bayanihan bakunahan’ sa December 15 hantod December 17, aron mapaspasan ang pagbakuna sa mga tawo. Gilauman ni Dr. Fidel Peñamante nga susama gihapon ang partisipasyon sa taga-Gensan aron magmalamposon ang pagkab-ot sa 70% target herd immunity. (Enamie Mogpon)
