LEGAZPI CITY – Sa pakikipagpulong sa Pangulong Bongbong Marcos nito lamang nakaraang linggo, sinabi ng Pamahalang Panlalawigan ng Albay, na isa sa pangunahing utos ng pangulo para sa lalawigan na maghanda para sa 90 araw na evacuation period sa halip na 45 araw, dahil tinitiyak niya na hindi gagamitin ng mga apektadong LGU ang kanilang Quick Response Funds nang buo.
Sinabi ni Albay Governor Edcel Greco Lagman sa isang panayam nito lamang Huwebes, Hunyo 15, na sa posibleng pagpapalawig ng evacuation period, mahalaga na maipamahagi na ang emergency cash assistance para sa mga evacuees.
Ito ay dahil ang mga evacuees mula sa mahigit 25 evacuation shelters sa Albay ay nagpahayag ng kanilang mga alalahanin tungkol sa kanilang kabuhayan kung sakaling ang aktibidad ng Mayon ay tatagal pa ng higit sa 45 araw.
Alinsunod naman dito, sinabi ni Gov. Lagman na ang pamahalaang panlalawigan ay patuloy na nakikipag-ugnayan sa Department of Social Welfare and Development (DSWD) hinggil sa cash for work financial assistance ng departamento, na magiging posibleng pandagdag ng pambansang pamahalaan sa pamamagitan ng emergency cash transfers. Bukod pa rito, sinabi ng gobernador na si Sec. Rex Gatchalian ang katuwang ng Pamahalaang Panlalawigan ng Albay (PGA), para makabuo ng plano kung paano makapagbibigay ng tulong ang DSWD sa aspeto ng tulong pinansyal.
