Gikustodiya na sa Cebu City Holding Admin Unit sa Cebu City Police Officeang policewoman nga naapil sa video nga nagviral sa Basilica del Santo Nino alang sa himoong imbestigasyon labot sa nahitabong insidente niadtong Sabado, Hulyo 27, 2024.
Ang Officer-In-Charge sa CCPO nga si Police Col.Antonietto Cañete nimando na sa pagparelibo sa maong sakop sa Tourist Police Unit human niini nakita sa nagviral nga video.
Sa video nga gipakita usab dinhi sa Brigada News FM Cebu sa maong sakop sa LGBT nga naila nga si Teacher Athena, ang maong policewoman usa sa mipugong sa maong transgender woman pagsud sa Basilica gumikan sa pagsul-ob niini og shortpants nga kutob ibabaw sa tuhod.
Mihatag pa sa iyang passport aron ibilin ug makahuwam og tapis ang maong LGBTQIA+ apan gilisod-lisod gihapon siya sa mga security personel ug sa maong policewoman.
Si Police Lt.Col. Gerard Ace Pelare sa iyang bahin kinsa tigpamaba sa Police Regional Office 7 mibutyag usab nga paminawon sab nila ang habig sa maong policewoman samtang ipaubos kini sa imbestigasyon.
Dugang ni Pelare nga ang mga pulis dili unta angayan moapil sa pagsusi o ba kaha pagkuha sa mga ID sa mga mosud sa Basilica kay ila na kini sa mga security guard kay ang trabaho sa police mao ang pagpatuman lang sa kahusay ug kalinaw kon adunay motumaw nga kagubot ilabi na sa ilang area of jurisdiction.
