NANGAMILIT na sa iyang mga sakop ug mga lokal opisyal sa Soccsksargen region si Police Brig. Gen Percival Augustus Placer.
Matud ni Police Major Risa Hernaez, tigpamaba sa Police Regional Office (PRO) 12 nagpahigayon na og exit call ang regional director nga si Gen. Placer sa mga local chief executive sa rehiyon.
Nagpasalamat matud pa ni Hernaez si Placer sa suporta nga gitunol sa mga opisyal sa kapulisan sa rehiyon.
Giestorya na usab ni Placer ang tanang mga sakop ug nagpasalamat sa suporta nga gihatag kaniya gikan sa paglingkod niini atong Marso 20.
Si Placer ang miyembro sa PNPA Tagapaglunsad Class of 1993 nga moretiro karong Agosto 4.
Samtang sa pangutana kung kinsa ang mohulip kang Placer, wala pay tubag niini ang PRO-12. Kahibaloan nga naa lang sa halos upat ka bulan nga naglingkod si Placer isip labaw sa PRO-12. I Richel Gubalani
