SORSOGON CITY – Handa ang buong hanay ng Provincial Health Office (PHO) Sorsogon sakaling umpisahan na sa lalawigan ang pagbabakuna sa mga kabataang edad 5-11 anyos.
Ayon sa pamunuan, hindi na bago ang usapin ng pagbabakuna lalo na’t nasubukan na ang pagbabakuna sa mga 12-anyos kung saan positibo ang naging tugon rito ng mga magulang at walang anumang naging problema sa lahat ng mga menor-de-edad na naturukan ng bakuna.
Nakita na rin ng karamihan ang kahalagahan ng bakuna, kung kaya’t tiyak na hindi ito gaanong magiging hadlang sa vaccination roll out ng edad 5-11 anyos.
Matatandaan na binigyan na ng emergency use authorization (EUA) ng Food and Drug Administration (FDA) Philippines ang Pfizer-BioNTech COVID-19 vaccine para gamitin sa nasabing age bracket.
Naaprubahan ang nasabing gamot dahil sa nakitang mild side effects lamang habang mataas ang efficacy nito na mahigit 90% para sa 6-11 taong gulang na batay sa naging clinical trials ay konting lagnat lamang na may mararamdamang sakit sa pinagturukan, subalit walang natukoy na kakaiba o mahalagang safety signals ayon sa DOH.
Nilinaw rin ng ahensya na mas mababa ang dosage at concentration na gagamitin sa 5-11 anyos, kumpara sa naibigay sa adults at kabataang 12-17.
