CAMARINES NORTE- Hinimok ng Provincial Health Office ang mga Cam Norteño na makiisa sa isa pang round ng National Vaccination Days na gagawin sa Disyembre 5- 7 ng taong kasalukuyan.
Ito ay upang mahikayat ang mas maraming tao na magpabakuna lalo na ng booster shots kontra COVID- 19.
Ayon kay Provincial Health Officer Dr. Arnel Francisco, iba pa ito sa nagpapatuloy na Barangayang Suyod Bakuna (BSB) na nagsimula noong Nobyembre 14 na magtatapos naman ng Disyembre 16.
Kaugnay nito ay hinimok ni Francisco lalo na ang mga hindi pa nagpapabakuna na magpabakuna na upang maprotektahan sa malalang pagkakasakit na dulot ng COVID- 19.
Sa ngayon naman ay patuloy umano ang ginagawang BSB sa mga bayan ng Daet, Mercedes, Labo, Paracale at Jose Panganiban kung saan sinusuyod ng mga health worker ang mga kabahayan para magbakuna.
Batay sa pinakahuling datos ng Provincial Covid- 19 Vaccination Operation Center hanggang nitong November 24, nasa 82. 3 percent na ang vaccination coverage sa lalawigan.
Nasa 75 . 8 percent naman ang nabakunahan sa senior citizen at 93. 1 percent sa 18- 59.
Sa pediatric population naman edad 12- 17 ay nasa 111. 3 percent ang vaccination coverage at 21. 5 percent naman sa 5- 11.
Mababa pa rin ang nababakunahan ng booster shot na nasa 11. 0 percent pa lang.
