Ipinag-utos ni Pangulong Ferdinand Marcos Jr. sa kinauukulan na isama ang gamot sa tulong na ipararating sa mga nasalanta ng bagyong Paeng sa Maguindanao.
Sa situation briefing na dinaluhan ni Pangulong Marcos kahapon kasama ang ilang opisyal ng Bangsamoro Autonomous Region of Muslim Mindanao (BARMM), sinabi nito na kailangan mabigyan din ng gamot ang mga nasalanta dahil posibleng nagkakasakit na ang ilan sa kanila.
Ayon kay Marcos, makikipag-ugnayan sila sa mga malalaking drug companies para sa pagbili ng maramihang gamot kung saan mas makakamura.
Gayunman, sinabi ng Pangulo na sa pagbibigay ng gamot sa mga naapektuhan ng bagyo, dapat tiyaking may riseta ng doktor bago ito ipamahagi sa mga evacuee.
Samantala, bukod sa gamot, pinapasama na rin ng Pangulo sa mga ibibigay na relief packages sa mga naapektuhan ng bagyo sa Maguindanao ay ang hygiene kits.
