Giatiman karon sa Funeral Parlor sa Digos City alang sa post mortem examination ang usa recovered patient sa COVID-19 nga naghunos sa iyang kaugalingog kinahubi kagahapon sa buntag.
Una niini, nadiskubrihan na lamang sa usa ka caretaker sa 4 Jewels Isolation sa Brgy. Poblacion, Sulop nga naghikog ang biktima gamit ang cable wire nga giilang si Liza Degamo Talaveros, 46-anyos.
Sumala kang Jeany Estribillo, nabisita pa niya ang biktima ug gipahibalo nga makagawas na siya gikan sa isolation facility human sa iyang pamahaw apan dihang iyang gibalikan ug gitawag dili na kini mutubag.
Gisusi sa maong staff ang lawak sa biktima ug didto nasuta nga nagyaka na kini sa salog samtang dunay nakahikot nga wire sa iyang liog busa nanawag kini og tabang apan gideklarang patay sa doktor sa Municipal Health Office.
Nasayran usab ayha ang insedente nakapadala pa og mensahe sa laing duty nurse ang biktima nga nangayo og pasaylo sanglit dili na matud pa makaya sa iyang lawas ang iyang giagian nag suliran. BNFM-DAVAO
