-Reymund Titong
KABANKALAN CITY, Negros Occidental — Indi lang matahom nga natural resources ang mahatag kag mapabugal sang syudad sang Kabankalan, kundi pati man ang pinasahi nga pagluto sini sang manok, nga mas kilala sa karun nga Papisik chicken.
Ang Papisik chicken ang isa ka putahe sang manok, sa diin tradisyunal ang pamaagi sa pagluto, bangud wala sang lain nga ingrediente ang ginabutang sa sulod sang sini kundi mga simpli nga mga lamas parihas sang batwan, tanglad, kag iban pa nga mga panakot samtang gina-luto sa isa ka kolon ukon clay pot nga may yara sang madamo nga asin, kung sa tagalog pa “manok na pinaupo sa asin.”
Suno sa panaysayon sa mga pumuluyo sa lugar, dinikada na ang nakaligad, sang may madamo nga mga nitibo sa lugar ang Gina gamit ang papisik bilang pamaagi sang pagluto sang manok ang na-andan sa tion kun may mga bisita nga magkadto sa ila Barangay.
Ang Papisik, ang halin sa tinaga nga pisik (spatter), bangud kun lutuon na ang manok sa kolon naga pisik ini. Dugang pa, ila man ini gina-konsiderar nga “culinary trademark,” kag ginahatagan importansya paagi sa pagpatigayon ang tuigan nga Papisik cookfest, sa diin pipila ka mga sitios sang ila lugar ang naga paindis-indis sa pagluto sang Papisik chicken, nga nagumpisa sang tuig 2000.
Pahayag ni Punong Barangay Geovanni Ibanez, nga ang ila Papisik chicken, ang tatak Tapianon nga dapat hatagan importansya bangud amo ini ang isa ka manggad nga indi maislan kag mabayluhan.
Ang Barangay Tapi ang nabukid nga barangay sang Kabankalan kag naga-layo sang halos 26 kilometros gikan sa sentro sang syudad.*