Panggagadan sa 19 anyos na PWD sa Daraga, primerong krimen na nairehistro sa banwaan ngunyan na 2024 – PNP

LEGAZPI CITY – Kinumpirmar kan Daraga PNP na an kaso nin panggagadan sa 19 anyos na lalaking PWD sa Purok 5, Brgy. Anislag, Daraga, Albay iyo an pinakaprimerong krimen na nairehistro sa saindang banwaan.

Kun babalikan kaya, nadukayan an bangkay sa gilid kan salog sa nasambit na lugar na tadtad nin saksak sa liog asin sa iba pang parte kan hawak kaini.

Binisto an biktima na si John Cedric Cabingan, deaf and mute, mantang an nasa likod kan krimen, sarong katorse anyos na child-in-conflict-with-the-law (CICL).

Huli sa nasambit na insidente, pinagirumduman ni Chief of Police PLt. Col. Edmundo Cerillo, Jr. an publiko orog na an mga magurang na i-monitor asin bantayan an saindang mga aki.

Sinabi niya sa intrevista kan Brigada News FM Legazpi na dapat bantayan an mga aki orog na su igwa na ki kapot na anuman na social media platforms sa saindang gadget na iyo kadalasan an pigpupunan kan mga iriwal.

Mientrastanto, an nasambit na insidente sarong isolated case asin maikokonsiderar nang solved.

Leave a Reply

Your email address will not be published. Required fields are marked *