LEGAZPI CITY – Apektadong maray an nagkapirang paraoma sa Pio Duran, Albay, makalihis na maubas an Panganiran Dam asin River nin huli sa matinding init kan panahon.
Sa intrevista kan Brigada News FM Legazpi kay MDRRMO Head Noel Ordoña, sinabi niya na nanutaran ninda an pagkamara kan salog asin dam kasuudma sa ikinondusir nindang monitoring.
Mientrastanto, dakula an epekto kaini sa sektor kan agrikultura sa banwaan, kun sain nakatanom na dapat an mga paraoma ngunyan alagad nagpundo muna nin huli ta dai kaya, mantang an iba naghahalat na baad umuran na lamang sa bulan nin Mayo.
Sa presente, huli na man sa kakulangan sa supply nin tubig sa kada residensya, igwa na nin mga residente na nagpapaarok na sana sa sentro kan banwaan nganing makakua nin tubig na gagamiton sa panguru-aldaw.
