DILI na ‘mandatory’ ang pagsuot og face shield sa General Santos City gawas medical ug hospital facilities. Kini ang gianunsiyo sa lokal nga panggamhanan pinaagi sa paggawas og ‘qoute card’ ug gipost sa official LGU page, Martes sa hapon.
Gitanggal na usab sa LGU ang pagpatuman sa curfew hour gawas sa mga minor de edad. Dili na usab rekisitos alang fully vaccinated ang RT-PCR test sa mga incoming flights. Samtang dili na usab ipailawom sa ‘quarantine’ ang local travelers o incoming passengers nga fully vaccinated.
Kalabut niini, takdang ipagula sa siyudad ang Executive Order (EO) sa mayor sa mga mosunod nga oras o adlaw. Ang anunsiyo sa LGU ang dungan pamahayag ni DILG Secretary Eduardo Año nga gitugotan nila ang mga mayor nga imandu ang pagtanggal sa polisiya sa pagsuot og face shield.
Tungod sa pagpaluag sa health protocols, gilaoman ni Dr. Ryan Aplicador, Chief of Hospital sa Dr. Jorge P. Royeca Hospital. Ang hugot nga pagsunod sa publiko sa ubang health protocols sama sa pagsuot og face mask ug pag-obserba sa physical distancing. Aron malikayan ang subling pagsaka sa kaso sa Covid-19, sa ulahing datus naa na lang sa 170 ang active Covid-19 cases sa GenSan. ( Richel Gubalani)
