Pinaiimbestigahan ni Manila 6th District Representative Benny Abante ang umano’y katiwalian at “smuggling” sa loob ng Bureau of Customs sangkot ang mga ukay-ukay.
Batay sa House Resolution 1602, nais ipasiyasat ni Abante ang pagtanggap umano ng nasa 1.5 million pesos na “tongpats” para sa ukay-ukay.
May ilang opisyal at empleyado aniya ng BOC ang tumatanggap ng tongpats, kapalit ng pagpapahintulot na maipasok ang mga ilegal na produkto gaya ng ukay-ukay.
Ayon kay Abante, ito ay paglabag sa Republic Act 4653 o batas na nagbabawal sa pag-aangkat ng “textile articles” o “used clothing” o mga gamit nang mga damit para sa proteksyon sa kalusugan ng mga Pilipino at mapanatili ang dignidad ng bansa.
Dagdag pa ng kongresista, sa kabila ng pagsasabatas ng Customs Modernization and Tariff Act, nakadidismaya na nagpapatuloy pa rin ang korapsyon sa BOC.
