Hugot nga ginadumilian sang mga kapulisan ang pagpalupok sang armas-luthang kag iligal nga firecrackers sa pagsugalaw sang bag-ong tuig.
Ini ang ginpahayag ni Police Major Myla Dela Cruz, tagpamaba sang Capiz Police Provicial Office (CPPO) sang ma-interview sang Brigada News FM Roxas City.
Suno kay Dela Cruz, posible nga magapangatubang sang kaso nga paglapas sang Republic Act 11926 ukon An Act Penalizing Wilful and Indiscriminate Discharge of Firearms ang mga madakpan nga nagapalupok sang armas-luthang apisar may lisensya pa ini sa diin mahimo nga mapreso sang isa tubtub 30 ka adlaw kag multa nga P40,000.
Samtang, magabayad naman sang penalidad ang madakpan nga nagapalupok sang anuman man nga sahi sang firecrackers.
Dugang pa sini, madamo sang mga pamaagi agud magselebrar nga wala nagatuga sang halit sa isigkapareho.
Nagpanugyan si Dela Cruz sa publiko nga magsunod sa mga ginapatuman nga layi kag mangin responsable sa pagselebrar sang bag-ong tuig agud malikawan ang disgrasya. | Judy Ann Juare
