-Reymund Titong
KABANKALAN CITY, Negros Occidental — Minutos matapos gin-anunsyar sang Negros Occidental Electric Cooperative (NOCECO) ang pagnubo sa presyo sang kuryente para sa bulan sang Hunyo, pipila ka mga kunsomidores ang nagsiling nga taktika lang ini kag “paumpaw” lamang ang pagnubo sang kuryente.
Para kay Irene Viason, lead convenor sang South Negros Power Advocates (SNPA), temporaryo lamang ang pagnubo sang kuryente, apang, kun mas mapadasig ang power agreement sa Kepco Salcon nga isa ka power supplier sa Cebu, mahimo nga maganubo pa gid ang presyo sang kuryente kag mas predictable kun e-kumparar sa mga power generator sa spot market.
Sa announcement nga ginpaguwa sang NOCECO, gab-e sang Hunyo 11, mas dako ang exposure ni NOCECO sa Wholesale Energy Spot Market (WESM), kag para sa bulan sang Hunyo, ang presyo ang yara sa P11.1674 per kilowatt hour matapos magnubo sang P4.8497.
Pahayag ni Viason, kun padasigon sang NOCECO ang approval sang power supply agreement (PSA) sang Kepco sa Energy Regulation Commission (ERC), iya ginalantaw nga dako pa gid ang mabuhin sa presyo sang kuryente sang kooperatiba, kag mangin magamay ang exposure sini sa spot market, diin mas mahal ang baligya-anay sang kuryente.
Sa karun, nagapatigayon pa sang virtual hearing ang NOCECO kag ERC nahanungod sa aplikasyon sang kooperatiba sang PSA sa Kepco Salcon Power Corporation (KSPC), nga Tani naka benepisyo ang linibo nga mga kunsomidores kun na-aprobahan na ini sang Disyembre tinalikdan nga tuig.
Para sa bulan sang Hunyo, ang presyo sang kuryente ang mangin P14.8015 nalang, gikan sa P17.9609 kada kilowatt hour nga presyo sini sa bulan sang Mayo.*