-Reymund Titong
KABANKALAN CITY, Negros Occidental — Ang mabaho nga hangin nga napanimahuan sa pipila ka lugar sa syudad sang Kabankalan ang bangud sa higko nga nagtipon sa isa ka vicinity sang Universal Robina Corporation- Southern Negros Development Corporation (URC-SONEDCO) humalin sang pag-untat sini sang galing (milling) sa una nga kwarter, subong nga tuig.
Sa dokumento nga nakuha sang Brigada News FM-Kabankalan, sang tinalikdan nga Abril 24, una na nga nagpatigayon sang pagsinapol ang Kabankalan Site Coodinating team, sa idalum sang City Planning and Development Office sang syudad, agud magpatigayon sang inspection sa SONEDCO, nga gina-tudlo sang mga pumuluyo nga rason sang pagbaho sang hangin sa Barangay Camansi.
Matapos ang inspeksyon sang syudad kaupod ang Department of Environment and Natural Resources- Community Environment and Natural Resources (DENR- CENRO), na kumpirmar nga gikan sa URC-SONEDCO ang pagbaho nga ginapalid sang hangin padulong sa pipila ka mga barangay sa Kabankalan.
Rason sang kompanya, nagabutang sila sang duwa ka sako sang kemikal nga ‘inoculant’ agud indi magbaho ang mga nagakadunot nga mga materyales, apang sabat sang DENR, dapat doblehon nila ang aplikasyon sang kemikal agud masiguro nga indi mag-resulta sang pagbaho.
Ang ika duwa nga nakita, nga apisar nag untat na ang galing (milling) sang kompanya, may nakita sa giyapon nga maitum, nagabukal-bukal, kag tuman ka baho nga likido nga nag-tinir sa Post 5 nga lugar sang kumpanya, nga posibli maka tuga sang masakit kun mahaklo, labi nagid sa may mga masakit sa baga (lungs).*