MOKABAT sa P250 milyon ang inisyal nga danyos ang gibiilin sa baha sa Maitum, Sarangani Province atong Martes.
Matud ni Raymond Mayled, Municipal Disaster Risk Reduction Management Council (MDRRMC) officer naa sa P130 milyon ang naguba nga imprasktratura sama sa duha ka tulay ug footbridge.
Samtang gibana-banaang naa sa P50 milyon ang danyos sa agrikultura ug livestock ang nadanyos sa hitabo.
Padayon pa karon ang gihimong ‘damage’ assessment sa lokal nga panggamhanan sa lugar, butyag ni Mayled.
Kahibaloan nga gipailawom na sa ‘state of calamity’ ang Maitum aron magamit ang porsyento sa P4.5 milyon quick response fund.
Una nang, gibutyag ni Mayor Alexander Bryan Reganit, naa sa 2,000 ka balay ang naguba, 100 niini ang totally damage ug naa sa 700 ka pamilya ang gibakwit sa municipal gym.
Samtang gikan sa 15 ka barangay nga apektado, pabilin ang Barangay Batian sa Maitum ang lisod pa sudlon.
Rason sa pagdala og pagkaon ug ubang supplies sa 38th Infantry Battalion (IB) sa mga residente sa lugar gamit ilang aircraft. Gikabutyag nga ang pagbaha ang dungan sa pag-overflow sa Pangi River tungod sa Low Pressure Area (LPA). I Richel Gubalani
