Mukabat sa P1.9 milyon ang kantidad sa mga peke nga sigarilyo ang nakompiska sa mga sakop sa Criminal Investigation and Detection Group(CIDG) Mandaue City Field Unit gikan sa usa ka tindahan sa M.C. Briones Street, Sitio Carbon, Barangay Ermita siyudad sa Sugbo sa niaging adlaw.
Nasikop sa maong operasyon ang usa ka Chinese national nga si Allen Lim, 40-anyos, temporaryo nga nagpuyo sa maong dapit.
Matud ni Police Captain Nigel Sanoy, hepe sa CIDG Mandaue City Field Unit nga nipalit sila og samples sa sigarilyo ug gipadala ngadto sa Japan Tobacco International nga maoy tag-iya sa Mighty ug Winston ug sa Phillip Morris Fortune Tobacco Company (PMFPC) nga tag-iya sa Marlboro ug gikumpermar sa maong mga kompanya nga peke ang maong mga produkto.
Tungod sa kumpermasyon naghiusa ang CIDG-Mandaue City Field Unit, JTI, PMFPC ug Bureau of Internal Revenue (BIR) sa paglusad sa nahisgutang operasyon.
Gikatakda nga pasakaan og kasong kalapasan sa Akta Republika 8293 kun “Intellectual Property Rights, Graphic Health Warning Law ug National Internal Revenue Code of 1997” ang suspetsadong Chinese.//
