LEGAZPI CITY – Nakumpiskar kan Police Regional Office 5 (PRO 5) an maabot sa P1.5M na kantidad nin ilgeal na droga sa rehiyon kan Bicol sa laog sana nin sarong semana.
Ini an ipighayag ni PRO 5 Regional Director PBGEN Andre P. Dizon kun sain sinabi kaining makukunsidirar man subuot ining remarkable accomplishment kan mga kapulisan dahil sa mas pinakusog nindang kampanya kontra iligal na droga.
Saiyang sinabi na an nasambit na kantidad nin iligal droga, nakua sa paagi kan mga ipigkondusir na mga Anti-Drug Operations poon Hulyo 8 sagkod Hulyo 14 ngonian na taon.
Basado subuot sa saindang datos para sa nasambit na semana, disenuebeng (19) indibidwal an imbwelto sa illegal drug activities asin tulos na nadakop kan saindang mga personahes.
Ini nagresulta sa pagkakasamsam nin 228.015 grams nin shabu asin 50.2 grams nin marijuana. Kun susumahon subuot, an estimated Dangerous Drugs Board (DDB) value kan mga nakumpiskar na droga, nag-abot sa P1,556,526.
Dugang pa kan opisyal, an matrayumpo subuot na operasyon, dakula na tabang para mahale na an droga, asin buot sabihon kaining dahil sa collaborative efforts asin pagtatarabangan kan saindang mga personahes, napapanimbag ninda an mga taong nagkasala sa batas.
