KORONADAL CITY- NAKATANGGAP ng petition para sa wage increase ang Regional Tripartite Wages and Productivity Board o RTWPB Region 12.
Ang naturang petisyon ay isinumite ng Trade Union Congress of the Philippines o TUCP noong Abril 11.
Isinusulong ng TUCP na gawing P 388 per day ang minimum wage sa Soccsksargen, na mas mataas ng P 52 mula sa kasalukuyang minimum wage na P 336.
Ang wage petition ay tatalakayin sa isasagawang public hearing ng RTWPB 12 sa Abril 26, 2022 sa Venue 88 sa General Santos City, ala-1:00 hanggang alas-5:00 ng hapon.
Una ng inihayag ni RTWPB 12 Secretary Jessie Dela Cruz na mas mainam kung may maisumiteng petition o position paper ang management at labor groups upang makatulong sa pagdesisyon ng board.
Ngunit nilinaw ng opisyal na may position paper man o wala, magsasagawa pa rin ng deliberasyon ang board at magpapalabas ng pinal na desisyon kung nararapat na ba ang umento sa sahod ng mga manggagawa sa Soccsksargen sa gitna ng sunud-sunod na pagtaas ng presyo ng produktong petrolyo at pangunahing bilihin.
