CAMARINES NORTE – Binuo na ng Department of Education sa lalawigan ng Camarines Norte ang Oplan Balik Eskwela (OBE) Public Assistance Command Center (PACC) upang masiguro na magiging maayos ang pagbubukas ng klase sa August 29 sa mga pampublikong eskwelahan.
Ito ay sa bisa ng Division Memorandum No 125 series of 2023 na pirmado ni Schools Division Superintendent Crestito Morcilla.
Ang Oplan Balik Eskwela Public Assistance Command Center ay pangungunahan mismo ni SDS Morcila bilang Chair at Vice Chair naman si Assistant Schools Division Superintendent Maria Flora Pandes na mayroong walong miyembro.
Kinabibilangan ito nina Atty. Niño Raro, Chief Education Supervisor, SGOD, Emma Soriano, Chief Education Supervisor CID, Administrative Officer V Antonio Ahmad, Atty Kimberly Israel, Planning Officer III Giovanni Asis, Medical Officer III Dr. Lirio Palencia, DRRMO Focal Person Geronimo Burce at Information Technology Officer Jay Dela Torres.
Ang pagbuo ng Public Assistance Center ay alinsunod rin sa DepEd Order 048, series of 2023 ni Vice President at Education Secretary Sara Duterte.
Ang lahat ng mga katanungan at iba’t- ibang concern para sa pagbubukas ng School Year 2023-2024 ay tutugunan ng SDO Camarines Norte sa pamamagitan ng email, website at Facebook page
Inatasan din ng SDO ang mga eskwelahan na magtatag ng Public Assistance Center sa kanilang lebel.
Ang Oplan Balik Eskwela Public Assistance Center sa mga eskwelahan ay bubuuin naman ng minimum na tatlo at maximum na limang miyembro depende sa school population. Kinakailangang mayroong sapat na kaalaman ang mga ito sa tamang enrollment process at iba pang mahahalagang impormasyon sa eskwelahan.
