GIPANIGURO sa Chairman of the Board sa Gensan Water District nga paigo ang supply sa tubig mainum sa Gensan sa panahon sa Kapaskuhan ug sa Bag-ong Tuig luwas lang kon ma-apektohan ang ilang linya sa construction ug sa mga natural disaster.
Sa pahayag ni Engr. Manny Yaphockun sa paghinabi sa 89.5 Brigada News FM Gensan sumala niini nga bag-o lang nakahatag og report ang ilang personahe nga nagkanayon nga subra ang volume sa tubig sa Water District kay adunay pumping stations nga dali lang mapuno ang mga tanke.
Kon sa sukdanan sa pressure anaa sa 32 PSI ang maabot pasabot nga kaya abuton ang hangtud ikatulo nga andana sa gambalay pataas unya ang maka-apekto daw sa paghinay sa agas sa gripo kon adunay mga dagkung tubo nga maigo sa ginahimo nga mga kanal ug dalan unya maguba.
Gidugang ni Yaphockun nga ang laing maka-apekto sa ilang linya ang sama sa linog nga makaguba sa mga linya sa tubig, apan anaa na kini sa ilang mga plano sa mga hinanali nga pagrespondi, sama usab sa mga dagkung sunog.
Samtang gikumperma usab ni Yaphockun nga nakahimo na sila og sulat sa mga barangay alang sa planong pagmuntar og hydrants sa kondisyon nga ang taga barangay ang magmintina sa hydrants.
Samtang plano usab nila nga dungagan ang overhead fire hydrant sa dalang Pendatun aron makatabang sa taga Bureau of Fire Protection kon adunay mga sunog. I Ver Diazon
