USA na usab ka masubo nga hitabo alang sa mga empleyado ug pamilya sa Brigada, ma-ingon man, kaninyong tanan, mga Kabrigada.
Pasado alas sais ning nakalabay’ng gabii, June 9, dihang gi-ambush sa mga criminal ang manager sa Global Dynamic Star Security Agency nga gipanag-iyahan sa Brigada Group.
Ang atong manager nga si Demar Santos, 37, usa ka amahan nga adunay pangandoy sa iyang mga anak, sayon lamang kaayo nga gikutlo ang iyang kinabuhi sa maong mga kriminal.
Sakit alang kanamo sa Brigada tungod kay kaniadtong niaging semana, ang among Director ug Chief of staff sa Brigada Group nga si Ms. Yentez Abedo-Quintoy gipusil-patay usab, susama sa mangilngig nga gihimo kang Mr. Santos.
Ang among kasubo tungod kay ang unang biktima nga si Yen, among empleyado, ang suspek sa pagpatay kaniya nga si Ralph Gerald Sorabia, usa pud namo nga empleyado. Si Demar nga gipatay karon, amo usab nga empleyado.
Sakit ug makasusubo kining tanan alang kanamo apan among gisalig ug gitugyan ang tanan sa atong mga otoridad ang pag-imbistiga ug paghatag ug kasulbaran niini nga mga krimen.
Among gisiguro nga walay pagbag-o nga mahitabo sa among kinasing-kasing nga pag-alagad diha kaninyo ug dili namo pakyason ang inyong pagsalig sa paghatud namo ug de kalidad nga mga serbisyo.
Manghinaut kami sa Brigada nga ang hustisya makabot nato sa hinnaling panahon alang sa mga nabiling mahal sa kinabuhi sa mga biktima.
Panalanginan kita sa Ginoong makagagahum.
