“AKSYONAN gyud nato na.” Mao kini ang gipasalig ni Barangay Captain Reynaldo Clapis sa Barangay Labangal may kalabutan sa reklamo nga pag-riot sa mga kabataan sa ilang lugar.
Segun ni Clapis human sa pormal nga paglingkod isip bag-ong kapitan sa Barangay Labangal niadtong udto sa Hunyo 30 nga bag-o pa milingkod sa posisyon may susamang insidente na nga nahitabo, asa usa ka 20-anyos ang naigo sa sumpak tungod sa riot.
Pagka Lunes matud pa nagmugna sila og usa ka team, gilangkuban sa barangay, kapulisan ug CSWDO, asa 31 ka mga minors ang na-rescue ug gipatawag ang mga ginikanan sa mga nahisgutan.
Gihatagan og warning ang mga bata nga dili na subling mag-riot.
Gidugang pa ni Clapis nga consistent matud pa ang ilang himuong operasyon sa pakig-alayun sa kapulisan ug sa pagpatuman sa curfew sa mga minors, sugod alas 10 sa gabii hangtud alas 4 sa kaadlawon.
Ginapanawagan na lamang niini sa mga ginikanan nga bantayan ang ilang mga anak aron nga dili malambigit sa riot ug madisgrasya na hinuon.
Pagpaklaro usab ni Clapis sa ikaduhang higayon nga madakpan ang mga kabataan, may himuon na matud pa ang barangay ngadto sa mga ginikanan.
