Nagtaas ang numero sang mga narekober nga illegal drugs sa Western Visayas.
Ini ang ginkumpirma ni Police Brigadier General Sidney Villaflor, director sang Police Regional Office VI sang ma-interview sang Brigada News FM Roxas City.
Suno kay Villaflor, nadugangan ang mga nagkaladakpan nga imbolbado sa iligal nga droga kag nagtaas man ang volume kag presyo sang shabu nga ila nakumpiskar.
Dugang pa sini, liwat naman nga nagadata ang droga bangud sadto gramo lang ang narekober sa mga operasyon apang subong nagalab-ot na sa kinilo.
Ginapangabay man sini, ang bulig sang pila ka mga law enforcement agencies kag pumuluyo sa komunidad agud matapna ang pagdagsa sang iligal nga droga sa Western Visayas.
Ginpahayag man ni Villaflor, nga indi na trabaho sang mga kapulisan ang pagbantay sa mga ports, seaports, airports kag terminal bangud yara ang Philippine Coast Guard, Philippine Ports Authority, Bureau of Customs kag madamo sang iban pa nga makapugong sa pagpatabok sang mga iligal nga droga gikan sa iban nga lugar. | Judy Ann Juare
