Magiging epektibo na simula December 1 ang muling pagpapatupad sa number coding scheme.
Ayon sa Metropolitan Manila Development Authority (MMDA), ang naturang scheme ay ipapatupad mula Lunes hanggang Biyernes, 5 p.m. hanggang 8 p.m., maliban sa holidays at saklaw lang ang mga private vehicles.
Kaugnay nito, pinaalalahanan ng otoridad ang mga motorista na may plakang nagtatapos sa 1 at 2 na bawal kada Lunes; 3 at 4 naman kapag Martes; 5 at 6 sa Miyerkules; 7 at 8 sa Huwebes at 9 at 0 sa Biyernes.
Sinabi ni MMDA Chairman Benhur Abalos, na batay sa datos, lumalabas na ang travel speed sa northbound portion ng EDSA ay nasa 9.66 kilometers per hour, kaya dapat ibalik ang number coding scheme sa afternoon rush hours para matugunan ang naturang problema.
Samantala, exempted naman mula sa modified number coding scheme ang mga public utility vehicles (kabilang na ang mga tricycles), transport network vehicle services (TNVS), motorcycles, garbage trucks, fuel trucks, motor vehicles na may dalang essential o perishable goods. //MHEL PACIA-TRINIDAD
