LEGAZPI CITY – Sa karsel na an bagsak kan lalaking pigkokonsiderar na No. 5 Regional Most Wanted Person kan Bicol Region huli sa magagabat kaining kaso makalihis arestaron kan mga personahes kan Guinobatan PNP sa Purok 6, Brgy. Maninila, kan nasambit na banwaan sa probinsya kan Albay.
Binisto kan mga otoridad an akusado na si alyas “Nomer” na nahahampang sa mga kasong qualified statutory rape na warang piyansa, qualified statutory rape through sexual assault na may PHP200,000 na piyansa, asin 13 punto nin qualified rape na wara man nin piyansa.
Inarestar ini sa kusog kan mandahamiento de aresto na inisyu kan Presiding Judge kan Family Court, 5th Judicial Region, Branch 2 sa banwan kan Daraga na pirmado kan Disyembre 19 kan nakalihis na taon.
An akusado, presente nang nagtetenir sa nasambit na hepatura para sa magkakanigong disposisyon.
