CHINESE national nga negosyante ug nagpuyo sa GenSan ang natumbok sa kapulisan nga tag-iya sa gironda nga warehouse.
Kini ang gikumpirma ni Police Col. Deanry Francisco, director sa Sarangani Provincial Police Office (SPPO).
Matud ni Francisco, natumbok nila ang tag-iya sa warehouse ang maong langyaw dungan sa mga dokumentong nakuha nila.
Giangkon usab niini nga kasong dunay kalabutan sa iligal nga droga ang takda nilang ipasaka batok sa maong langyaw.
Gikumpirma usab ni Francisco nga dili gamit sa pagmina, agrikultura ug textile ang mga nakumpiskang illegal drugs manufacturing equipments. Gihulat na usab karon ang pending sa Philippine Drug Enforcement Agency (PDEA) 12 ug PNP Soco aron mapasaka na ang kaso.
Domingo sa buntag, bitbit ang search warrant gisulod sa otoridad ang warehouse nga naa tunga sa kabukiran sa Sityo Sagel, Barangay Pinol, Maitum Sarangani.
Nagtuo si Francisco nga lig-on ang ilang ebidensiya batok mga indibidwal nga nagpaluyo sa pagtukod sa warehouse nga gituohang mahimong drug laboratory kung wala kini nadiskubre. I Richel Gubalani
